Sisi Senaponi's Corner - Inside Life

 Hahahahahahahha.....

Kpoi! Kpoi! Kpoi! Na who dey haase e?!

Stellabasma-jellof...how de weather?! I hail o!


Nna ehn, this kain rain wey dey fall suddenly for this period, traffic jor plenty anyhow for Matron side! Choi!


*Even as pampers don corss,and protection still dey affordable o!* *clickstongue*

Adon kukuma dey use eye calculate the ones wah go chop their Rice before person enter village for December!


All dem Mama Christano and Papa Ronaldo! Make God have Messi on them for delivery day abeg!

The ones wey na Overcomer & Conqueror (election twin babies) when election go well, na Pounded Yam i go balance and conshume!

God forbid say person go get reason to name pikin Tuffy or Kally as short for Tufiakwa and Calamity after elections o! *God abeg!*


I jam Nnamdi as i been come from Matron side, they jor install AC for clinic reception. I say mah go collect small breeze for dia!


Abin nor know say the AC na 360 Goatpower! The thing go first vibrate for 10minutes before e begin blow thyphoid breeze!

Small time the breeze sef go switch to handfan mode, after that one, na shisha mode follow!!

Na so smoke full everywhere! The patient weh sidon under the AC, remain small wey her Badagry Shuku sef for catch fire!


The yeye electrician dey shout na sometin sometin horsepower! Na horsepower!


Asay oga abeg, shift mah pass,anor get strength for argument this evening biko!


You geh luck say nor be me you carry that kain AC come give! AC wey be say only God know wia dem go thief the thing and resell!

Fit be one deliverance place wey one evil spirit wey dem comot for customer..sorry, member body, jump and hide inside the AC.


As the half-baked pastor nor carry better anointing to see where e hide, and send am comot go where Haruna gather goats and pigs dey sell...sorry i don forget say na Lagos we dey!


Before the pigs sef go treck, reach Lagoon to jump and enter! Nna ehn, i go suprise if hungry bandits nor kidnap them finish!


No body dey tell evil spirit if na with fry he wan take re-die abi na boil he wan boil!*clickstongue*


All those ancient evil spirit wey nor dey check calendar see say we nor dey Elijah era!

I comot there, naim i see Nnamdi, he come greet him Babe. *clearsthroat*

Abin wan wait mah meet the babe.

But anor dey sure if i go fit 'not' ask her, if the bros wey come drop her one night, wey enter her house and nor gree comot till daybreak, enjoy the bottle water wah sell gee dem! *clickstongue*


*Na oyinbo call am customer follow up!*


Anor know why una dey worry sah go! Anor follow Nnamdi! Na yard i face! I wan go lem small Garri with my remaining Okra Soup!


This Nnamdi sef, after all him suffer, he still nor get luck with better women!*Hian*


I don kukuma collect Nnamdi number! *Popsgum*


Anor know as breeze go blow me one day, wah go jor press phone, wan confirm if na im get the Jeep wey pack for him Babe side around that kain 11pm?!


So i go fit ask him babe, if she wan buy her regular bottle water abi na Moort she want?! *sideeyes!*!


As good in law wah be!